حيرت بالى معاك ومبقتش عارف أخبى
قوللى أعمل ايه وياك بيقولو عليك سبب غلبى
أنا لا بهاجمك ولا بعاتبك
ولا تفتكرنيش خايف منك
أنا زى أى مصرى نفسى أسألك
وقبل كده من حقك عليا أشكرك
لأنك فى يوم دافعت عن بلدك
وفى الحرب كنت نسر والكل شهدلك
ياللى عانيت الضنك زمان مع أهلك
ياللى حاربت الفساد بجد مع صحبك
مين فى وطنيتك بعد كده يشكك
بس اعذرنى لما احتار وارجع أسألك
وعلى كل اسمعنى والحكم فى الاخر لك
ياترى عارف ان الحكومة باعت أراضينا
والمصانع اللى بينتها وتعبنا فيها وشقينا
خسروها وراحت معاها اخر أمانينا
فى صناعة مصرية وطنية تعلى فى يوم بينا
واللى اشتروها مشوا عمالها أهم حوالينا
يرضيك بعد اللى فات عواد يضحك علينا
أما الزراعة غليت على الفلاحين
والسماد ميقدرش عليه غير المنغنغين
والجاز غلوه الضعفين ومبقوش ملاحقين
بكرة كيلو القوطة اللى كان بقرشين
هيبقى بعشرة جنيه وبعده هيبقى بخمسين
أما بقى اخوانا السادة الموظفين
فهم كالعادة غلابة ومطحونين
هيقولولك طبعاً أصلهم مش شغالين
طب مش دى غلطة المسئولين النايمين
لا عارفين يديروا ولا حتى يوقفوا التعييين
الولاء والطاعة اساس ترقية المحظوظين
اما الكفاءة بناقص المهم انت تبع مين
واللى كان يا ولداه محوش للزمن قرشين
طلع عليه النهار لقاهم يساووا مليمين
اصل كل حاجة بقت الضعف والضعفين
ولا طايل يبنى بيت ولا يربى العيلين
واللى هيتجوز الشبكة اخرها جرامين
اما العفش فكله بالكتير اوضة او اتنين
والسكن حبذا يكون مع حد من الوالدين
أقولك بلاها جواز اديك شايف المتجوزين
لا فيهم مبسوطين ولا حتى منهم اللى عايشين
واعلامنا الهادف رافع شعار يعيش المهلسين
نيجى بقى على اخواننا الاقطاعيين
متستغربش أهم فوقنا وحواليك موجودين
وطبعاً هيقولوا اننا عليهم حاقدين
هو من امتى المصرى كانت بتترفع له عين
هتلاقيهم فى كل مكان برجالتهم محوطين
على كل مصالح البلد عام وخاص مكوشين
وفى كل مقاولة ولا مشروع عليهم العين
وابو خمسة لما تحط عليه العمولتين
يتنفذ بمية ولو اتكلمت تبقى من المخربين
اسالهم سعادتك ايه سر الكرش التخين
وكل ثرواتهم دى جابوها منين
ازاى الواحد منهم فى اقل من سنتين
يبقى من اللى بيقولوا عليهم اصحاب ملايين
انا مش غرضى حاجة وحشة ..قولو امين
أنا بس نبقى كلنا من خبرتهم مستفيدين
ويبقى الشعب مفهوش لا غلابة ولا مساكين
ياترى حد يكره من السادة الافاضل المبجلين
دى يا ريس باختصار الحالة الاقتصادية
محصلناش أيام مجتمع النص فى المية
ولا لاقيين الغدا فول أو طعمية
وبنفطر ونتعشى تصريحات وردية
ومش هقولك على الامن ولا الديموقراطية
ولا الانتماء والهجرة الغير شرعية
ولا اللى هو عمل ولا اللى هيه
ياترى انت عارف يا زعيم الامة المصرية
ولا قالولك الشعب حياته فل مية المية
بينى وبينهم تيجى فى ساعة فجائية
صبح ولا ظهر عصر ولا عشية
تعالى وامشى فى شوارع المحروسة البهية
هات عيالك واطلع فى رحلة ريفية
او خوض معاهم معركة فى المدينة القاهرية
هتعرف ببساطة شكل حياتنا اليومية
وساعتها هتقدر تحدد البعدا الحرامية
وهنشوف هتعمل ايه لاصلاح الحالة المزرية
حجة ياليك يا عليك قدام رب البرية
وان شاء الله تبعدك عن جهنم المؤذية
وتدخل بيها جنة الخلد الخلد فى سعادة أبدية
يارب من كل قلبى والسامعين امين
ودى هديتنا بمناسبة عيد ميلادك التمانين
محمود عبدالله المصرى |
بداية
