عذرا تميم ..قالوا لى بتحب مصر قلت خايف
انا منك يا مصر وانتى منى ...اكيد انا عارف
بس اسالى ولادك وعداكى..الكل اهو شايف
موكب القهر في كل يوم على ولادك طايف
وظلام الفقر لنهار شمسك وقمر ليلك لافف
قالوا لى بتحب مصر قلت خايف
انا خايف لانى بقيت على ارضك من اهلك ذليل
بعد ماكنت في عز احتلالك جذعى ما يميل
خايف لانى من الفقر بعت ولادى جيل ورا جيل
وانا اللى كنت باكل شعوب العالم اجود المحاصيل
خايف لان شربى من ميتك خلانى عليل
راح زمنك يا للى غنى بطهرك الشعرا يا نيل
خايف لانى في زحمتك مش لاقى على طريقى دليل
ولقيت ولادك بيفروشوا للاجنبى فوق الورد منديل
معذورين فيه لدولاره اصل الجنيه بقى هزيل
فين ايام النص افرنك ايام الرطل والزمن الجميل
خايف لانى في شوارعك وحواريكى هديت الحيل
وملقتش شغلانة تكفينى رغم الصبر الطويل
خايف لاقول الحق ويعلى صوتى بالعويل
الاقينى بين يوم وليلة معتقل والاسم عميل
قالوا لى بتحب مصر قلت خايف
انا صوتى من كتر الالم بقى محشور
وببات في كل ليلة مهموم ومكسور
كنت فاكر الحال ده يومين ولا حتى شهور
بس طال وشكله هيفضل مكمل لدهور
انا بقى دمى على ارضك يا امى مهدور
وبقى ولادك منك بيهربوا ويعدوا ليكى بحور
وبقى الشريف فيكى يا معزول يا مأسور
يا اما في لحظة يطير راسه سيف مسرور
وبقى الحرامى فوق روس الكل مشهور
بيمجد له في اليوم كام مليون ماجور
خلاص مبقاش باين لليك فجر ولا نور
والشعب اللى كان محارب ولا يوم هيثور
وعذره انه في رحاية اكل العيش بيدور
قالوا لى بتحب مصر قلت خايف
عارفك وسامعك على حالك بتبكى وتندبى
وبتقولى انت مش منى تحرم عليك سمرتى
بس قبل ما على وعلى جيلى تغضبى وتعتبى
اسمعى منى وانا راضى باللى بيه هتحكمى
عارفة ليه شبابك مبقاش ليك بينتمى
لان الام بتدى من الحمل للفطام وبعدين تربى
ولا تبخل بمال ولا جهد ولا من التعب تبكى
ولما يكبر ولدها عمرها للحنان ما تخبى
عشان كده لما في يوم تكبر يقول على اتعكزى
وقبل ما تطلع الاه يقول افديها بدمى
ياريتك يا مصر بالحق والعدل عليا تحكمى
انا مش باعاتبك بس ببجيلك الجاى اهتمى
وخللى بالك عدوك راصد ولعينكيى بيغمى
وانا هفضل شايل همك ومش هشيلك همى
بس وحياة حبك متزعليش منى يا امى
لانى بكل صراحة حقيقى اسف
لو سالونى بتحب مصر هقول خايف
محمود عبدالله المصرى |
بداية
