تقرير ختامى من حكومة العجب
للسيد الرئيس ولى العهد المرتقب
________________________
سعادة الباشا اتفضل واركب
حبيت اهنى واقول يا الف مرحب
جهزنا لسيادتك كل الملعب
الخزنة الفلوس فيها بقت للركب
منين؟! سيبك ما تقعدش تحسب
كام شركة بعناهم كده من غير مكسب
وسبوبة من الشلة اللى عمالة تهلب
وبعنا ارضنا مرتين ومن غير نصب
شرطنا الغلبان يبنى والا منه تتسحب
وبالصدفة بعدها بقى الحديد بسعر الدهب
اصلنا غلينا كل حاجة حتى الزفت المهبب
والساسة عمالين يجروا حولين الملعب
بتوجهياتكم مبقاش فيهم ولا نص حزب
كلها اسماء والاعضاء في بعض بتضرب
او طرابيش مستخبى فيها كام أرنب
او حبايبنا الوطنيين بتوع قزقزة اللب
والمجلس طبعاً حر ونزيه منتخب
سواء كان محلى شورى ولا شعب
وكلهم اساتذة في الاخلاق والادب
في الجلسات لحد بيهب ولا يقدر يدب
ديتهم بس من الوزراء امضا على كام طلب
واهو كله لاكل عيشه بيقلب
واللى يفكر يحيط ولا بجد يستجوب
يطلعله استاذ قانونجى عقرب
انه بيخل باللوايح ودوغرى هيتشطب
اما النقابات والهيئات ملهومش في اللعب
تروح فين القطط في مكر التعلب
هنشتتهم ونوريهم ان اللى ضدنا يتعب
واللى هنحبوا هو اللى اكيد هيكسب
بس يسكت اخواته احسن نزعل ونغضب
وساعتها عليه جماعته هتتقلب
وحالهم يبات خربان والعدل فيه متشقلب
والصحافة حرة مستقله وخبرها مننا بتسرب
بتقول وتتكلم وتهاجم زى صحف الغرب
بس اللى من الذات الملكية فكر يهوب
بالقانون عرفناه ايه معنى الادب
وبناء على رغبات اشقائنا العرب
حطينا ميثاق اسمه فضائيات في العلب
أما الشعب فده اغلب من الغلب
بقى كل امله ميشوفش يوم اصعب
ومنى عينه ينام وياكل ويشرب
واللى يفتح بقه منهم يبقى عميل وكلب
وعلاجه معروف الحبس والضرب
ياللا ياباشا اتفضل واركب
وسوق واتغندر في كل الملعب
وطبعا بمجيتك هيتفك الكرب
ديتها كام صحفى يألف ويكتب
وغنوة وفيلم وشوية خطب
وتمد ايدك على الجرح تطبطب
وتغرف حبة فلوس تديها للشعب
هيشيلوك جوة حبابى القلب
وهيهتفولك وتبقى الزعيم الاب
شفت سيادتك انه مبقاش صعب
وانه بسياستنا الرشيدة –الهولاهوب-
تبقى حاكم اكبر واغنى العزب
عزبة اجدادك الفراعنة ابا عن اب
مبارك عليك وعلى كل الشعب
وكده طبعا انا مش هقدر اقرب
ولازم حتما اشرق او اغرب
انا عارف طبعا ومش مستغرب
دورى خلص ولازم علطول اهرب
طولت عليك وعطلتك عن اللعب
على كل اسيبك بقى في احضان الشعب
بكرة هييوريك وللمر هتشرب
محمود عبدالله المصرى |
بداية
