ياشعبى الحبيب الصبور المهاود
لحد امتى فوق دماغك هتاخد
وياحكومة اقطاع حاسبى من المارد
ده تحت ضحكته غضب قايد
.........
قولتوا لنا اصل الاسعار عالمية
طب ايه دخل فول بلدى والطعمية
طب المبالنى والسماد ولا اراضينا الزراعية
عجبى عليكى يا حكومة يا بهية
طب نحسبها معاكوا بنفس الكيفية
نحسب دخولنا وسط الدخول العالمية
ومش هنقول السوق ولا اسعار تجارية
هنقول كلام اكبر منظمة دولية
اللى ياخد اقل من دولار في اليوم حالته مستعصية
يعنى بالمصرى خط الفقر فوق الالف والخمسمية
ياترى كام واحد في المحروسة البهية
مرتبه اصلا يعدى الخمسمية
ده حكومتنا الرشيدة الواعية الاقطاعية
حلفت لمليون اسرة تاخد معاش شهري بس مية
......................
ياشعبى الحبيب الصبور المهاود
لحد امتى فوق دماغك هتاخد
وياحكومة اقطاع حاسبى من المارد
ده تحت ضحكته غضب قايد
............................
وقولتوا لنا ياللا هنلعب ديموقراطية
ومن النهاردة كله يمارس السياسة بحرية
ويقول رايه بصراحة عايزين معارضة قوية
والصحافة ميثاق هتعبر عن الجماهير الشعبية
وصحينا على انتخابات جامدة ومنافسة حقيقية
ختمت بضرب واعتقالات وبلطجة همجية
وطلع الشعب كالعادة غلطان بالتبعية
اصله معملش اللى عايزاه حكومة الوسية
وعشان متحصلش تانى حلها في القانونية
يالا بينا نعمل حبة تعديلات دستورية
ونشيل منها القضا ومطالبه هنطلعها فئوية
وعلشان ميعملناش تانى ثورات شعبية
هنسلط عليه منه فيه فتنة رايحة جاية
ويا شعب صوتك معروف مية في المية
انت وطنى صح ولا ... انت عارف البقية
خليك في لقمة عيشك والكورة وفيلم واغنية
ولو قفلت معانا هنعملك قلق وفتنة طائفية
وسيبك دى السياسة وجع دماغ وعلمانية
او محظورة مغرضة وشوية احزاب استغلالية
قلنا ماشى يا صبرى اصبر كمان شوية
ما شاء الله عليكى يا حكومة يا شاطرة يا واعية
البنات والجنس بقوا اصل كل اغنية
اصل الحب بتاع زمان وموال العذرية
كلام فاضى المهم البنات العريانة اللى هية
والفيلم بقى حاجة جامدة مش عادية
شذوذ وبلطجة ونصب ورقص وحرامية
هى دى اللى هتاخد جوايز مهرجانية
هى دى مصر في عيون ولادها للسينما العالمية
والكورة احسن حاجة تتوه وتظبط العملية
حالها في كل الجرايد منشتات وعناوين رئيسية
فلان جه وعلان راح وملايين طالعة من الاندية
ولا كان عمره فرق بين مسلم ومسيحية
بس عايزين تحرقوا دمى وبلعبة جهنمية
عايزين انسى لقمة عيشى المشكلة الاساسية
بس عمرى ما اتعودت اكلها إلا ونفسى ابية
فين البرنامج ووعودك يا حكومة ليه
ادينى ماشى في ظل خططك وخطبك الوردية
ورجعتى حتى العيش عايزة تغليه عليه
اه منك ياحكومة يا قادرة يا مفترية
لولا الملامة كنت قلت انك عميلة اسرائيلية
بس الحق مش عليكى الحق حقيقى عليه
انا اللى سيبتك تتنمردى وعملت فيها ولية
وانا الشعب اللى علم الناس الحرية
انا ابن مصر المحروسة الحرة الابية
انا اللى حاربت كل الدول الاستعمارية
وانا اللى دافعت عن الامة العربية
وطلعت علما في كل مجال حتى النووية
انا اقدر احمى الهوية ومصر الحلوة الحقيقية
وان كنت عليكى صابر بس لانك مصرية
بس الصبر مش هيفضل صابر عليكى للابدية
ويا خوفى لتنتهى ولايتك نهاية بايديا دموية
.................................
ياشعبى العظيم الكريم ياللا عاند
وريهم ان كل مصرى ينفع ولا اجدع قائد
وكفاية سكوت وعشان حريتك قوم وجاهد
ولا ناوى تفضل علطول الصبور المطاطى المهاود
محمود عبدالله المصرى |
بداية
